أهلا جدة

أهلا جدة

أهلاً من بيكست

إيش هيا بيكست؟

إحنا وكالة رقمية متخصصين في كل خدمات تقنية المعلومات، وإحنا شغالين من جدة للعالم كله. مع أسلوبنا الخاص إللي سويناه بنفسنا ومن أرواحنا. إحنا بنبرمج ونكتب أكواد مرة كثير بأحسن طريقة في بيكست. عشان إحنا مرة نحب الحاجتين دي. صح إنو عالم البرمجة مرة كبير، لكن إحنا نحبه وحطينا هدفنا عليه ورسمنا طريقنا فيه. هنا في بيكست عارفين قدراتنا مرة مزبوط، عشان كدا ركزنا وقتنا ومهاراتنا إننا نتعلم أكثر، ونسوي حاجات أكثر وأكثر في برمجة وتقنيات الويب وتطبيقات الهواتف الذكية، وبرضو عندنا لمستنا الفنية المبدعة والخاصة بينا والخارجة عن المألوف لكثير من الناس. وزيادة على دا كله، كان لازم نكتشف نفسنا أكثر ونحسن قدراتنا عشان نصير مسوقين أفضل وأحسن في العالم الرقمي إللي حنفتحلك أبوابه ونسهل طريقك فيه لك شخصياً أو لعملك ومشاريعك.

روح بيكست زي ما تفتكر، هيا مننا. لكن مين إحنا؟ طيب، إحنا وبكل بساطة، شوية مطورين وفنانين بسيطين، ما نحب الكلفة والتعقيد، وفي نفس الوقت نحب الشي إللي نسويه من كل قلبنا. ومتفائلين جداً بالمستقبل المشرق. وغير دا كلو، إحنا مرة نكره كل القواعد والتعليمات والأنظمة القديمة ”الطريقة القديمة-الحالية“ إللي ما تتناسب مع التطور الحاصل في الفترة الحالية وإللي راح تحصل في المستقبل كمان. عشنها وبكل وبساطة قوانين وقواعد قديمة وإحنا لسى طازة وجديدين. بس!!

 

 

إيش تسوي بيكست؟

إحنا مبرمجين مطورين، عشان كدا إحنا بنبرمج وبنطور. تطبيقات هواتف ذكية للـ iOS والـ Android وكمان برامج أجهزة سطح المكتب إللي تشتغل على نظام macOS ونظام Windows -لكن بنسوي الشي دا في النادر؛ عشان الويب صار الخيار الأفضل-، تطبيقات الويب وبرضوا المواقع والمتاجر الإلكترونية. وإحنا مصممين فنانين، عشان كدا بنصمم تصاميم مرة حلوة، هويات تجارية وبننتج فيديوهات قصيرة “مشوقة” وحلوة كمان. وعشان هنا في بيكست بنسوي دا كلو ما شاء الله علينا، كان لازم نتعلم كيف نسوقها صح وفي الوقت المناسب في العالم الرقمي.


غير هذا الخدمات، نحب نقدم خدمات صغيرة شويتين، من ضمنها إنشاء حسابات بريد الأعمال الإلكترونية، الإستضافة، أسماء النطاقات، تصميم الويب، إشهار محركات البحث، إدارة حسابات التواصل الإجتماعي، إستراتيجيات المواقع. وأهم وأكثر حاجتين أي مطور برمجيات ناجح يسويها، تصميم تجربة و واجهة المستخدم. لو تعرفوا بس قد إيش هنا في بيكست نحب الحاجتين الأخيرة دي! إننا نبسط الأفكار المعقدة، نحصل أفضل وأسهل وأقصر طريق للمستخدم إنه ينجز المهمة إللي يبغاها، هذه من جد حاجة مرة نحبها في بيكست.

 

إيش يعني بيكست؟

طيب، هنا يجي الكلام، اسمنا (بيكست) مكون من كلمتين إثنين، والكلمتين هذه تِعرّف العالم الرقمي كله.

الكلمة الأولى ”بت“؛ ( البت (بالإنجليزية: bit) يتم في الحواسيب تخزين المعلومات ومعالجتها على شكل بتات (bits) وبذلك يكون نظريا البت أصغر وحدة حاملة أو ناقلة لمعلومة. مصطلح البِت يعبر عن الأرقام في نظام العد الثنائي (Binary Digit)، وهو الوحدة الأساسية لكمية المعلومات في الحاسب والاتصالات الرقمية. يمكن لهذه الوحدة أن تحتوي على واحدة فقط من قيمتين ولذلك تطبق فيزيائياً بآلة ذات حالتين. غالبا هاتان القيمتان تمثّلان كصفر أو واحد، ويمكن أيضاً أن تفسرا كقيمتين منطقيتين (صح أو خطأ) ، (نعم أو لا)، أو حالتا تفعيل وتعطيل (on/off) أو أي خاصية أخرى ذات قيمتين. التوافق بين هتين القيمتين والحالة الفيزيائية للآلة هو مسألة تناسب. ويمكن القيام بعدة تعيينات لهتين القيمتين من خلال نفس الآلة أو البرنامج. — ويكيبيديا ). وبالنسبة لنا، ”البت“ يمثل الجزء الداخلي من أي تطبيق ويب، موقع أو متج إلكتروني، تطبيق هاتف ذكي أو أي شي ثاني إحنا نطوره ونسويه. وإحنا بناخذ في بالنا أهم المعايير والطرق المستخدمة الحديثة عشان نحافظ على جودة الجزء هذا بأسلوب بيكست الخاص.
الكلمة الثانية ”بيكسل“؛ ( البِكْسِل أو العُنْصُورَة أو النقْطة (بالإنجليزية: Pixel) هو أصغر عنصر منفرد في مصفوفة صور نقطية أو في عتاد توليد صور، أي أنه أصغر ما يمكن تمثيله والتحكم في خصائصه من مكونات الصورة على الشاشات بتقنياتها المختلفة، وأصغر ما يمكن مسحه وتخزين بياناته في الماسحات الضوئية، أو في مستشعر الكاميرا الرقمية.. — ويكيبيديا ). وبالنسبة لنا، ”البيكسل“ يمثل الجزء الخارجي من أي تطبيق ويب، موقع أو متج إلكتروني، تطبيق هاتف ذكي أو أي شي ثاني إحنا نطوره ونسويه، أو الهويات التجارية و تصاميم الجرافكس و الحملات الرقمية أو أي شي ثاني إحنا نصممه ونسويه. إحنا بناخذ في بالنا أهم المعايير والطرق المستخدمة الحديثة عشان نحافظ على جودة الجزء هذا بأسلوب بيكست الخاص.

وبحكم إننا خلصنا من الجزء هذا حق إسمنا والشي إللي يمثله، نبغى نضيف إنو إحنا من جد نبغى نغير ونطور من الثقافة التقنية في السعودية. ونبغى نطور البرمجيات من تطبيقات ومواقع بطرق مختلفة غير تقليدية وبالطريقة إللي المفروض تكون عليها. حلوة من برة ومن جوة!

أخر شي، عشان نثبت لنفسنا ولغيرنا إننا ملتزمين ومتميزين بهويتنا، أخذنا إلهامنا وألواننا من ألوان النموذج اللوني ( الأحمر الأخضر الأزرق – RGB ) المستخدم في البيكسل/البيكسلات. لكن أستخدمنا درجات مختلفة شويتين عشان نتميز أكثر دحين وفي المستقبل. حتى الشعار أخذنا إلهامنا من الكلمتين الأساسية عندنا (البت) و (البكسل)؛ المربع الأحمر-زهري شويتين، مأخوذ من شكل البكسل، وباقي الحروف تمثل شكلين البت لأنها أصلاً أترسمت على شكل صفر وواحد، بعد كذا عدلناها شويتين عشان تطلع بالشكل الحالي للحروف الإنجليزية.

 

إيش هيا قيم بيكست؟

عشان نزود على الكلام إللي قلناه في صفحتنا ”عن بيكست“، بخصوص مهمتنا ”نطور أسلوب حياة بواسطة الجميع“ وكمان رؤيتنا ”نطور أسلوب حياة للجميع“. حنزود شرح بسيط شويتين هنا كمان عشان توضح ”الصورة الكبيرة“.

البيان الكامل الخاص بمهمتنا؛ التحسين ونشر ثقافة جديدة، التوضيح والتفاعل. هذه الكلمات الأربعة تمثل المهمة والرسالة إللي إحنا مركزين عليها. نحسن جودة تطوير البرمجيات في المملكة العربية السعودية ونحسن جودة التصميم كمان. ننشر الثقافة الرقمية المعلوماتية بالصورة الصحيحة وبطريقة مرة حلوة لكل الناس في السعودية. نوضح كل المصطلحات والحالات الرقمية و التقنية، ونساعد كل المحتاجين للشي هذا. نتفاعل ما بين عملك وما بين معايير بيكست، عشان نطبق أخر وأحدث الطرق في التسويق والتصميم والبرمجة إللي نحبها. كل هذا عشان نوصل مع بعض لأعلى الأماكن في النجاح.
البيان الكامل الخاص برؤيتنا؛ نطمح إننا نكون معروفين ومشهورين كعلامة تجارية معلوماتية في العالم الرقمي داخل المملكة العربية السعودية وخارجها، إلهام الناس إنهم يسوو الشي الصح في حياتهم الرقمية بتطبيق أسلوب حياتنا الخاص. نوفر أفضل وأحسن الحلول الرقمية مثل تطوير البرمجيات، التصميم الجرافيكي، والتسويق الرقمي، وحتى الأعمال الجاهزة بعد ما نحط لمستنا عليها؛ لكل الناس في جدة و السعودية.

وعشان نحقق حلمنا، حنتعلم أكثر، نشتغل أكثر ونطبق أكثر وأكثر. حاليا جالسين نخطط ونسوي أكثر من فكرة تطبيق هواتف ذكية، عشان ندعم بيها أسلوب حياتنا إللي حيكون أحسن أسلوب حياة تقني بالنسبة لك. حنتأكد مرة كثر من الشي هذا.

 

مين همّا عملاء بيكست؟

إنت. بكل صراحة، عملائنا ما زالو قليل لحد الأن. لكن إحنا نحب البدايات الصغيرة ونحب نكون معاها، لأنها الأفضل. وعشان إحنا نحب الشي إللي بنسويه ونسوي الشي إللي نحبه برضوا، عارفين إنو حننجح بعون الله وحنخليك تنجح إنت كمان.

الدنيا مازالت فيها فرص مرة كثير، وإحنا حنغتنمها كلها إن شاء الله، حتى لو بس عشان تكون إنت مبسوط مننا! خليك فاكر إنو بيكست تحبك، وتحب عملك وشغلك. وإذا في أي مرة كنت متخوف من أسعارنا، فوقف الشي، إحنا في النهاية بشر. عشان كدا حنساعدك بكل إللي نقدر عليه. بيكست موجودة عشانكم إنتو. عشان كدا إيش رأيك تسوي معانا موعد إجتماع وتخلينا نتشرف بيك ونشرب فنجان قهوة مع بعض؟ على حسابنا!